Ætla at stovna lutaíbúðafelag

Fleiri av hesum 950 fólkunum tørva onkursvegna innivist, og nú íbúðartrupulleikin støðugt tykist vera átroðkandi, er ætlanin at fáa sett eitt felag á stovn, so fólk kunnu fáa sær eina lutaíbúð.

At álvari liggur aftanfyri, sæst kanska ikki minst á, at ætlanin er at hava ein kunnandi limafund tann 18. januar og ein stovnandi aðalfund ein góðan mánað seinni, tann 22. februar – í báðum førum á Finsen í Havn.

– Av tí at tað er so dýrt hjá fólki at ogna sær eina íbúð, kunnu lutaíbúðir vera ein møguleiki at útvega fólki ein bíligari bústað, sigur Hans Jacob Hermansen, stigtakari til ópolitiska áhugabólkin “Lutaíbúðir”.

– Tað ræður um at fáa bygt so bíligar íbúðir sum gjørligt, samstundis sum talan er um dygdaríbúðir, ið eru væl bjálvaðar, bæði viðvíkjandi ljóði og hita, og so skulu tær vera so bíligar í rakstri sum gjørligt.