Føroyingar snúsa meira

Tøl, sum Hagstova Føroya hevur roknað saman fyri Kringvarpið, vísa, at innflutningurin vaks úr sjey tonsum í 2011 upp í 11,8 tons í 2021.

Í vøruskránni er snús bólkað saman við skrá, men nøgdin av snúsi er nógv størri enn nøgdin av skrá, verður upplýst.

Í virði er eisini talan um stóran vøkstur. Innflutningsvirði fyri tey sjey tonsini í 2011 var 900.000 krónur, og innflutningsvirði fyri tey 11,8 tonsini í 2021 var sjey milliónir krónur.

Serliga fleiri ungir snúsarar
– Fólkaheilsustýrið hevur varnast at alsamt fleiri eru farin at snúsa – serliga ungfólk, sigur Magni Mohr, granskari.

Nútímans snús er ofta kryddað við leskiligum smakki og innpakkningurin er bæði litfagur og snøggur, men hann vísir á, at snús er vandamikið.

– Tað verður brúkt nógv orka upp at greiða fólki frá vandanum við at roykja, men ikki so nógv um vandan við at snúsa, sigur Magni Mohr, ið leggur afturat, at Fólkaheilsuráðið fer at viðgera støðuna.