Ikki øll fagna kappingarleisti

Enn hava fótbóltsfeløgini kring landið ikki havt møguleika at viðgjørt uppskotið um nýggja kappingarleistin, sum Fótbóltssambandið legði fram í gjár og ætlar at seta í verk longu komandi kappingarár.

Men ikki øll eru líka fegin um eina kapping við felags grundspæli og endaspæli í einum niðara og einum ovara bólki.

- Tað er ógvuliga óheppið fyri føroyskan fótbólt, um nýggi kappingarleisturin gerst veruleiki. Heldur skuldi Betri-deildin verið víðkað, og so kundi eitt endaspæl verið har, sigur formaðurin í FC Hoyvík, Fróði Danielsen.

Feløgini møtast aftur til formansumfar í desembur mánaði, og tá fáa tey møguleika at geva sína hugsan um nýggja kappingarleistin til kennar.