Christian í Grótinum besta skip

Tað eru serliga nótaskipini, ið hava gjørt tað væl.

Árið í ár er tað besta til fiskiskap nakrantíð, bæði tá ið talan er um nøgd og um virði.

Fiskað er fyri fýra milliardir krónur og tað er 100 milliónir meira enn í fjør, tá ið fiskað var fyri 3,9 milliardir.

Nøgdin er eisini tann størsta nakrantíð, 747.000 tons.

Christian í Grótinum best

Í ár hevur Christian í Grótinum, gjørt tað best. Hann hevur fiskað fyri 246 milliónir í ár. Christian í Grótinum er frá mars 2022.

Nummar tvey á listanum av nótabátum er Norðborg. Teir hava fiskað fyri 235 milliónir krónur í ár. Í fjør fiskaðu teir mest, tá ið teir fiskaðu fyri 263 milliónir.

Nummar trý er Gøtunes. Teir hava fiskað fyri 226 milliónir krónur. Í fjør fiskaðu teir fyri 187 milliónir krónur.

Akraberg best av flakatrolarunum

Flakatrolararnir hava eisini gjørt tað væl, tó ikki eins væl og í 2022.

Akraberg hevur fiskað fyri 131 milliónir krónur, Enniberg fyri 120 milliónir og Sjúrðaberg fyri 74 milliónir krónur.

Í fjør var Enniber nummar eitt, teir fiskaðu fyri 171 milliónir, Gadus fyri 129 og Sjúrðaberg fyri 106 milliónir.

Klakkur best av línuskipunum

Fleiri av línuskipunum hava eisini gjørt tað væl.

Klakkur hevur fiskað fyri 57 milliónir. Tað eru tó 11 millióir minni enn í fjør, tá ið hann fiskaði fyri 68 milliónir. 

Kambur hevði næstmest avreiðingarvirði. Hann fyskaði fyri 39 milliónir. Í fjør fiskaði hann fyri 48 milliónir.

Jógvan I var nummar trý. Hann fiskaði fyri 39 milliónir. Í fjør fiskaði hann fyri 61 milliónir. 

Tað er Stýr, ið er komið við tølunum. Tað er eisini teir, ið løgdu tølini fram, tá ið Fiskimannafelagið hevði aðalfund í vikuni.