Leikurin "Skeivur" er partur av nýggjari verkætlan hjá Tjóðpalli Føroya, har evnaríkir ungir leikarar sleppa á pall saman við royndum og útbúnum leikarum. Við leikinum fær áskoðarin ein ógloymandi býtúr í Luux, og sleppur at uppliva dukandi náttarlívið og kaga beint inn í føroyska ungdómslívið anno 2026 - uttan filtur, skrivar Tjóðpallurin. Kultura vitjar í Luux.

Í oktober 2024 vunnu SNA arkitektar uppskotið til heildarætlan fyri høvuðsumvæling- og útbygging av gamla Venjingarskúlanum á Frælsinum 20 í Havn. Frælsið 20 er partur av størri kampusverktætlanini frá 2018, sum m.a. fevnir um ein nýggjan felagsbygning á Nóatúni. Men hvussu transformerar mann ein gamlan, slitnan fólkaskúla frá 60´unum til eitt nútímans universitet - við støði í verandi bygningum og arkitekturi?

Bárður í Baianstovu, arkitektur hjá Landsverki, sum stendur fyri byggingini, og Inga Katrin Winther Næs, arkitektur og kreativur leiðari hjá SNA arkitektum, sum hava teknað umvælingina- og útbyggingina, koma í útvarpsstovuna.