Íslendingar fegnast um samstarvið við Smyril Line

Smyril Line fær sera gott skoðsmál frá borgarstjóranum í Þorlákshøfn í Íslandi.

Elliði Vignisson sigur við Fiskifréttir, at samstarvið við Smyril Line er sera gott og miðvíst.

Tað sigur hann í sambandi við, at nýggja farmaskipið hjá Smyril Line, Akranes, fyri fyrstu ferð var í Þorlákshøfn týsdagin.

Borgarstjórin sigur, at skjótt verður nýggjur sleipi- og bjargingarbátur keyptur til havnina.

Havnin verður eisini útbygd, so hon fær tikið móti størri skipum enn nú.

Hugsað verður millum annað um ferðafólkaskip, sum sigla millum Ísland, Bretland og evropeiska meginlandið.

Møguleikarnir eru nógvir, og tá er óført at hava samstarv við eitt felag sum Smyril Line, sigur Elliði Vignisson við Fiskifréttir.