Kina krevur umbering frá Jyllands-Posten

Kina krevur nú eina almenna umbering frá  danska dagblaðnum, Jyllands-Posten. 

Blaðið prentaði í gjár eina tekning av kinesiska flagginum, har tær fimm reyðu stjørnurnar eru býttar um við fimm corona-virus.

Kinesiska sendistovan í Danmark sigur í tíðindaskrivi í morgun, at Jyllands-Posten og teknarin, Niels Bo Bojesen, skulu viðurkenna mistakið, og geva kinesiska fólkinum eina almenna umbering.

Ein háðan

Meðan kinesiska stjórnin og fólkið gera alt fyri at basa heilsuhóttanini, og altjóða samfelagið stuðlar Kina, prentar Jyllands-Posten eina tekning,  sum háðar Kina, sigur sendistovan.

Ábyrgdarblaðstjórin á Jyllands-Posten, Jacob Nybroe, sigur, at blaðið fer ikki at koma við nakrari umbering.

- Vit hava prentað eina tekning, sum nýtir kinesiska flaggið og corona-virusið sum karm um eina hending, ið ávirkar allan heimin í løtuni, sigur Jacob Nybroe.