Coronavirusið rakar donsk reiðarí meint

Stóru donsku reiðaríni verða ávirkað í keypsskálunum av coronavirusinum, skrivar Berlingske. Tað hendir serliga eftir at virusið er farið at breiða seg av álvara uttan fyri Kina.

Virðið á partabrøvunum hjá Mærsk, Norden og Torm eru nógv lækkað, og væntandi flutningurin kann hava við sær, at feløgini longu hava mist ein umsetning uppá 12 milliardir krónur, skrivar Berlingske.

At coronavirusið nú eisini breiðir seg í Italia og í Suðurkorea, merkir, at støðan gerst enn truplari, og ilt er at meta um, hvat kann henda, sigur danski greinarin, Michael Friis Jørgensen.

Fleiri onnur merkja eisini sviðan

Tað eru eisini onnur donsk feløg, sum merkja sviðan av gongdini, og tað er galdandi fyri flutningsfeløgini, DSV og SAS.

At virðið minkar so nógv, sum talan er um, meir enn 10 prosent, setir feløgini í eina torføra støðu, sum kann gerast uppaftur verri, um gongdin við coronavirusinum stendur við ella versnar, sigur greinarin.

Tað hevur stóran týdning fyri Mærsk, hvussu gongdin verður við virusinum, tí felagið hevur 75.000 viðskiftafólk í Europa og USA, sum skulu hava vørur úr Kina og øðrum londum í fjareystri, talan er bæði um handlar og aðrar fyritøkur.

Mett verður, at higartil eru 1,7 milliónir bingjur færri fluttar, enn tað sum vanligt hevur verið, og tað merkja flutningsfeløgini væl, siga greinarar.