Tók lýsing um munn- og nasarmasku aftur

Ein handil, sum lýsti við munn- og nasarmasku, sum var góðkend sum verja fyri koronavirusi, hevur tikið lýsingina aftur.

Tað hevur handilin gjørt, eftir at Brúkaraumboðið gjørdi vart við, at handilin kundi ikki prógva, at maskan er góðkend.

Í lýsingini varð eisini sagt, at fólk skuldu keypa maskuna áðrenn grannin.

Brúkaraumboðið heitti á handilin um at vera varin við orðingum, sum kunnu ræða.

Lýsingin kann skiljast, sum munn- og nasarmaskur verja privatfólk móti smittu, men Brúkaraumboðið vísir á, at almennu heilsumyndugleikarnir ikki mæla vanligum fólki til at brúka munn- og nasarmasku.

Brúkaraumboðið ger ikki meira við hetta málið, tí lýsingin er tikin aftur.