Heilusverkið kann verða overvað

Forsætisráðharrin í Bretlandi ávarar fólk ímóti at vitja hvønn annan, nú mammudagur er í landinum.

Boris Johnson sigur, at bretska heilsuverkið er í vanda fyri at verða overvað, um bretska fólkið ikki tekur ávaringarnar í álvara og ger sítt til,at tálma smittubreiðsluni av koronavirusinum, skrivar BBC.

Leygardagin vóru 233 fólk deyð av virusinum, og meir enn 5000 tilburðir vóru staðfestir. 

Heilsuverkið fer at senda brøv til 1,5 milliónir fólk, sum eru í vandabólkinum.

Hesi fáa at vita, at tey skulu ikki fara út yvirhøvur næstu 12 vikurnar fyri at verja seg sjálvi, sigur stjórnin. 

Millum hesi eru fólk, sum hava cystiska fibrosu og tey, sum hava blóð- ella beinmergskrabba. 

Smittan breiðir seg skjótt

Gjárkvøldið segði Boris Johnson, at tølini síggja ikki gott út, og at smittan tekur alt meir dik á seg. 

 - Italia hevur eitt sera gott heilsuverk, men teirra læknar og sjúkrarøktarfrøðingar hava ongan møguleika at fylgja eftirspurninginum, segði Boris Johnson. 

 - Deyðstølini í Italia eru nú fleiri túsund, og tey veksa skjótt. Um vit ikki gera ein felagsinnsats fyri at steðga útbreiðsluni, er sannlíkt, at okkara heilsuverk verður overvað á sama hátt sum í Italia, segði forsætisráðharrin. 

Bretland er bert tvær ella tríggjar aftanfyri Italia, segði Boris Johnson, og legði afturat, at hann er varugur við, at tiltøkini, sum stjórnin hevur sett í verk, ongantíð eru sæð áður, hvørki í friðar- ella krígstíð, men at tey eru lívsneyðug.