- Tíðindi, mentan og ítróttur
Heldur tilfeingisgjald enn serskatt
![](https://kvf.fo/sites/default/files/styles/grein-ovasta-mynd/public/malan_johansen1.png?itok=LX1NvVQl)
Landsbankin sigur sum Búskaparráðið, at fleiri pengar fáast í landskassan við at krevja tilfeingisgjald frá fiskivinnuni enn at taka skatt, tá veiðiloyvi verða seld við vinningi.
Landsbankin sigur við Fíggjarnevndina hjá løgtinginum, at sera trupult verður at umsita eina lóg, sum krevur skatt, tá veiðirættindi verða seld, og ivasamt er, um landskassin fær nakað burturúr slíkari sølu.
Ein skipan við árligum tilfeingisgjøldum er heldur ikki løtt at gera, men ber tó væl til, sigur Landsbankin.
Heldur tilfeingisgjald
Heldur enn at taka serskatt, tá rættindi verða seld, eiga vit at taka alla tilfeingisrentuna inn umvegis tilfeingisgjaldið, sigur Landsbankin.
Tilfeingisrentan verður tikin við at áseta veiðigjald fyri hvørt fiskað kilo.
Veiðigjøldini eiga at verða sett so, at tey taka inn alla ta mettu, ella roknaðu, tilfeingisrentuna. Tilfeingisrentan er tað yvirnormala avkastið.
Fyrimunurin við einum árligum tilfeingisgjaldi er, at landskassin fær gjald fyri veiðirættindi, heldur enn ein skatt, har sum inntøkan er óviss, og har eingin kann siga, hvussu nógv verður goldið, nær nakað verður goldið, og har tað er ivasamt, um nakað yvirhøvur verður goldið, sigur Landsbankin.