Nøgdin av makreli er ikki minkað

Makrelkanningarnar fyri í ár eru av, og tær vísa, at nakað meir av makreli var at síggja, og munandi meira av sild. Men minni var av svartkjafti, skrivar Havstovan á heimasíðuni.

Tað serliga í ár var, at ongin makrelur var í grønlendskum øki og sera lítið við Ísland.

Gongdin, at makrelurin flytur seg eystureftir, byrjaði longu í 2018.

Harafturímóti var rættiliga nógvur makrelur fingin í Norskahavinum og norðan fyri Føroyar.

Talan er sostatt um, at makrelurin flytur seg eystureftir, heldur enn eina minking, tí samlaða nøgdin av makreli er ikki minkað seinastu árini, skrivar Havstovan.

Meir sæst um kanningarnar á hav.fo.