Ein smittutilburður staðfestur á flogvøllinum

Ein tilburður av koronu varð staðfestur á flogvøllinum gjár, har øll verða kannað, sum koma til landið loftvegis.

Talan er um eitt fólk, sum býr í Føroyum. Viðkomandi  er avbyrgdur, og farið er undir smittusporingina, upplýsir Landslæknin.

Allar royndir, sum vórðu tiknar týsdagin og í gjár, eru nú greinaðar, og nú eru fleiri enn 100.000 kanningar gjørdar.

33 smittað í løtuni

Nú hava 412 fólk fingið staðfest smittuna í Føroyum. 379 eru frísk aftur, og 33 eru smittað í løtuni.

29 av teimum eru russiskir sjómenn, sum ikki hava verið í landi í Føroyum.

Tvey fólk liggja á sjúkrahúsi, men hvørgin er á intensivari deild, upplýsir Heilsumálaráðið.

Hálvt ár síðani fyrsta tilburðin

Í dag er hálvt ár síðani, at fyrsti koronutilburðurin varð staðfestur í Føroyum.

Tað varð 3.mars, at ein maður í Hoyvík, sum hevði verið í París, varð staðfestur at vera smittaður.