Keypa og umbyggja eldri hús til ítróttarháskúla

Lógin um at veita stuðul til ætlaða skúlabygningin hjá Ítróttarháskúlanum í Vági er settur á løglistan í heyst, men í løtuni ber ikki til at siga, nær peningur verður játtaður.

Tað sigur Jenis av Rana, landsstýrismaður í uttanríkis- og mentamálum, í svari til Sirið Stenberg, løgtingskvinnu, sum spurdi, um landið ætlar at játta tríggjar milliónir kr til Ítróttarháskúlan, so skúlin fær betri hølisumstøður og møguleika at taka fleiri næmingar.

Jenis av Rana sigur, at samskifti er við umboð fyri Ítróttarháskúlan um at keypa og umbyggja eini eldri hús, Vaskiskúrin á Gørðunum í Vági. Kontrast hevur gjørt uppskot um umbygging og innrætting, og byggikøn frá Landsverki kanna nú verkætlanina.

Landsverk hevur víst á nøkur viðurskifti, eitt nú kostnaðarmetingina og staðsetingina, og neyðugt er at viðgera hesi viðurskifti nærri, áðrenn støða verður tikin, um peningur skal játtast til verkætlanina, sigur landsstýrismaðurin í mentamálum.

Ítróttarháskúlin hevur tørv á betri hølisumstøðum, og tað vil landsstýrismaðurin tryggja, sigur Jenis av Rana í svarinum til Sirið Stenberg.