Í 2060 vera 55.600 fólk í Føroyum

Í august 2060 vera 55.590 fólk í Føroyum.

Tað sigur ein framrokning hjá Hagstovuni. 1.august í ár var fólkatalið 52.816.

Og eisini um 40 ár vera fleiri menn enn kvinnur í Føroyum. Munurin verður framvegis okkurt um 2.000.

Tá fólkatalið verður framroknað, verða føðitíttleiki og deyðstíttleiki, tilflyting og fráflyting síðani 1985, brúkt sum grundarlag.

Stór óvissa

Stórar óvissur eru í slíkum framrokningum, og tí vera sannlíkindaframrokningar brúktar.

Sambært framrokningunum minkar fólkatalið, tá øldin er komin í helvt. Í mai 2055 búgva 56.594 fólk í Føroyum, 1.000 fleiri enn í august 2060. Og í august 2055 verður fólkatalið 56.560.

Í 2060 eru 54,7 prosent av fólkinum 40 ár ella eldri. Bara 45,3 prosent eru yngri enn 40 ár.

Nú er hetta øvugt.