Lukasjenko farin undir nýtt forsetaskeið

Forsetin í Hvítarusslandi, Aleksandr Lukasjenko, tók í dag við nýggjum forsetaskeiði. 

Tað skrivar Reuters.

Tað var ikki alment boðað frá, at hátíðarhaldið skuldi verða í dag, og AFP-tíðindastovan skrivar, at hátíðarhaldið var hildið loyniligt.

Sambært AFP vóru fleiri vegir í høvuðstaðnum, Minsk, brádliga stongdir, og bilafylgi hjá Lukashenko koyrdi gjøgnum býin.

Hetta fekk fleiri miðlar at halda, at forsetin skuldi takast í eið loyniliga fyri at forða fyri mótmælisgongum.

Lukasjenko heldur fram í forsetasessinum, hóast skuldsetingar hava verið um valsvik á forsetavalinum í august, har Lukasjenko tilnevndi seg sjálvan sum sigursharra við meira enn 80 prosentum av atkvøðunum. 

Hann hevur longu sitið sum forseti í 26 ár.