Viðgera støðuna aftur í dag

Nevndin í Felagnum Føroyskir Sjúkrarøktarfrøðingar sat á fundi, til seint í gjárkvøldið og viðgjørdi støðuna, nú felagið hevur vrakað semingsuppskotið, sum Semingsstovnurin legði fyri partarnar.

Óluva í Gong, forkvinna í felagnum, sigur, at nevndin fer at hava fund aftur í dag, men hon veit ikki enn, nær felagið kemur til eina niðurstøðu um, hvat gerast skal. Hon sigur, at samskifti hevur eisini verið við álitisfólkini. 

Lønardeildin góðtók semingsuppskotið

Mótparturin, Lønardeildin í Fíggjarmálaráðnum, góðtók hinvegin semingsuppskotið.

Sjúkrarøktarfrøðingarnir fingu boðið tað sama, sum aðrir starvsbólkar á almenna arbeiðsmarknaðinum hava fingið bjóðað, men tað góðtóku teir ikki, segði Jan Mortensen, stjóri á Lønardeildini hjá Fíggjarmálaráðnum, við útvarpið í gjárkvøldið. 

Óluva í Gong, forkvinna í felagnum hjá sjúkrarøktarfrøðingunum segði, at tey ikki lata seg trýsta til nakað, sum tey ikki kundu taka undir við.

Hon vildi hava tíð til at viðgera støðuna í nevndini.