Norðoyatunnilin stongdur um næturnar til í februar

Felagið Tunnil boðar frá í morgun, at Norðoyatunnilin skal dagførast, og tað arbeiðið byrjar í kvøld.

Norðoyatunnilin verður stongdur um næturnar frá sunnukvøldi til fríggjamorgun frá klokkan tíggju um kvøldið til klokkan seks um morgunin. Koyrandi verður tó klokkan ellivu, á midnátt, klokkan tvey og fýra.

Vegøksl og verja skulu stoypast fram við báðum síðum gjøgnum allan tunnilin. Hetta verður gjørt fyri at tryggja, at bilar ikki koyra inn í óregluligan sprongdan tunnilsvegg.  

Sama arbeiði gerast í Vágatunlinum

Samstundis skal SEV leggja tveir kaðalar gjøgnum tunnilin. Ljós verða sett á kantsteinin. Harafturat verða lekar tettir.Tunnilin varð upprunaliga bygdur við einum pumpubrunni á botni. 

Kanningar hava víst, at mesta vatnið lekur undir Háfjalli, sum er frá Klaksvík og niður í hálva brekkuna. Nýggj pumpustøð verður gjørd 1.600 metrar frá tunnilsmunnanum Klaksvíksmegin.

Tá arbeiðini í Norðoyatunlinum eru liðug, ætlandi í februar næsta ár, verða somu arbeiði gjørd í Vágatunlinum. Har verður tó ikki nýggjur pumpubrunnur gjørdur. Minni lekur, og Vágatunnilin er ikki líka djúpur sum Norðoyatunnilin.