Íslendski uttanríkisráðharrin í Føroyum

Íslendski uttanríkisráðharrin, Guðlaugur Þór Þórðarson, er í Føroyum. 

Hann kom í gjár og fer av stað aftur sunnadagin.

Jenis av Rana, landsstýrismaður, og Guðlaugur Þór Þórðarson hava fund fyrrapartin í dag um handilsviðurskiftini landanna millum.

Uttanríkisráðharrin vitjar eisini Vatnaskarðar hjá Sigerti Patursson, formanni í Bóndafelagnum, og Krás í Hósvík.

Seinnapartin í dag vera Jenis av Rana og Guðlaugur Þór Þórðarson á ráðstevnuni Brexit, møguleikar og avbjóðingar, har teir fara at røða um, hvørjar møguleikar og avbjóðingar Brexit hevur fyri ávikavist Føroyar og Ísland. 

Ráðstevnan er partur av FaroExpo 2020 í Runavík.