SEV skal halda prísavtaluna við dótturfelag

Elveitingareftirlitið í Umhvørvisstovuni hevur álagt SEV at gjalda dótturfelagnum, Vindfelagnum í Húsahaga, sambært prísavtaluni millum Vindfelagið og SEV net.

Prísavtalan sigur, at Vindfelagið ikki kann avroknast fyri minni framleiðslu enn 41,4 gigawatttímar, uttan so at Vindfelagið ger minni streym enn tað, og tað ikki skyldast viðurskifti hjá SEV.

Samskifti hevur verið millum SEV net og Elveitingareftirlitið um, í hvussu stóran mun vantandi elframleiðsla inn á elnetið stendst av viðurskiftum hjá sjálvum Vindfelagnum, ella viðurskiftum hjá SEV neti. 

Gera niðurstøðu

Endalig niðurstøða, um SEV net hevur avroknað ov nógv til Vindfelagið, kemur í næstum. 

Tað sigur Helgi Abrahamsen, landsstýrismaður, sum hevur svarað skrivligum fyrispurningi frá Johan Dahl, løgtingsmanni.

Hann sigur eisini, at elprísirnir í Føroyum eru hækkaðir nógv meira enn í Danmark seinastu 10 til 15 árini.

Elprísirnir í Føroyum eru teir hægstu í Evropa, tá eingi avgjøld eru tald við, stendur í svarinum.