Leggja bara uppí, um trygdin er í vanda

- Vit vóna framvegis, at sjúkrarøktarfrøðingarnir og lønardeildin finna semju um nýggjan sáttmála.

Tað sigur Helgi Abrahamsen, landsstýrismaður í arbeiðsmarknaðarmálum, nú semingsmenninir eru givinir við royndini at fáa partarnar at semjast.

- Tað einasta, sum kann fáa okkum at leggja uppí, er, um trygdin hjá sjúklingunum er í vanda, sigur hann.

Nú eru 17 dagar, síðani sjúkrarøktarfrøðingarnir lýstu verkfall.

Hoyr innslag í útvarpstíðindunum.

Óluva í Gong, forkvinna í sjúkrarøktarfelagnum, sigur í kvøld, at felagið umrøður støðuna, og at undantøkini, sum eru givin, eru í gildi, til klokkan trý seinnapartin í morgin.

Í Fíggjarmálaráðnum er støðan óbroytt, sigur Jan Mortensen, stjóri á lønardeildini, og semingsmenninir hava einki frætt frá pørtunum, sigur Terje Sigurðsson, semingsmaður.