Fleiri vansar enn fyrimunir

Fyrimunirnir við at halda fram við Kærustovninum eftir verandi leisti eru færri enn vansarnir. Tað er niðurstøðan hjá arbeiðbólkinum, sum hevur endurskoðað bygnaðin hjá Føroya kærustovni.

Arbeiðsbólkurin hevur latið løgmanni álitið, sum er 84 síður. Arbeiðsbólkurin hevur 14 ítøkilig tilmæli um broytingar.  Eitt høvuðstilmæli er at flyta allar 11 nevndirnar, sum Kærustovnurin í dag er skrivstova hjá, inn í sjálvan Kærustovnin. 

Hetta merkir, at Kærustovnurin sjálvur viðger kærumálini og tekur avgerðir sum sjálvstøðugur myndugleiki. Flestar avgerðir hjá kærunevndunum eru fyrisitingarrættarligar ella grundaðar á fyrisitingarrætt, har løgfrøðin er tann berandi parturin. 

Servitan

Henda servitan er í Kærustovninum, og tí kunnu løgfrøðingar í stovninum avgreiða flestu mál. Serkøn kunnu verða knýtt at stovninum sum ráðgevar at heita á, stendur í álitinum.

Føroya kærustovnur byrjaði í 1998. Arbeiðsbólkurin varð settur 29.mars í fjør.

Í honum vóru fýra fólk, Nella Festirstein, deildarstjóri á lógartænastuni á Løgmansskrivstovuni, hon var forkvinna, Anja Hovgaard, stjóri á Kærustovninum, Beinta Festirstein, fulltrúi á Kærustovninum, og Bárður Larsen, adjunktur á Fróðskaparsetrinum.