Oyggjaleikirnir útsettir í tvey ár

Oyggjaleikirnir, sum skuldu vera á Guernsey næsta ár, verða útsettir í tvey ár, til 2023.

Tað hevur oyggjaleikanevndin, IIGA, avgjørt.

Jørgen Pettersson, formaður í Oyggjaleikanevndini, sigur í tíðindaskrivi, at hetta var ein torfør avgerð at taka, og øll harmast um, at leikirnir verða útsettir í tvey ár. Men heimfarsóttin hevur ávirkað øll limalondini bæði heilsuliga og fíggjarliga, og ítróttarfólk hava tí ikki havt møguleika at fyrireika seg.

At leikirnir nú verða útsettir í tvey ár, hevur við sær, at leikirnir, sum skuldu vera í Orknoyggjunum í 2023, eru útsettir til 2025. Leikirnir á Ynys Mon, sum skuldu vera í 2025, verða útsettir til 2027.

Ætlanin var, at oyggjaleikirnir skuldu vera á Isle of Man í 2027, men Isle of Man verður væntandi vertur í 2029 í staðin, boðar Oyggjaleikanevndin frá.