Marjun Lómaklett verður integratiónsprestur

1. februar fer sóknarpresturin, Marjun Lómaklett, at røkja nýggja tænastu í fólkakirkjuni. Í eitt ár verður hon integratiónsprestur og fer at gera tænastu millum teirra, ið eru nýføroyingar.

Tað skrivar Jógvan Fríðriksson, bispur, á  heimasíðuni hjá Fólkakirkjuni. 

Fólkakirkjan hevur sett sær fyri at vera við í arbeiðinum at taka væl ímóti teimum fremmandu, ið velja at seta búgv í Føroyum. Aðalmálið er at vera teimum fremmandu, ið koma til landið, til gagns og nyttu andaliga og tímiliga. Tey fremmandu eiga at kenna seg vælkomin og verða møtt við heitum hjørtum, ið eru hjástødd gerandis og heilagt, sigur bispur.

Gudstænastur á enskum

Ein av uppgávunum hjá integratiónsprestinum verður at hava gudstænastur á enskum máli. Talan er millum annað um at byggja brúgv millum teir nýggju føroyingarnar, kirkjuna og samfelagið. Dentur verður eisini lagdur á at varpa ljós á tey mentanarligu virðini, so tey, ið koma til landið, lættari kunnu gerast ein partur av heildini, skrivar bispur.

Mett verður, at kirkjur, ið hava møguleika til sosiala samveru eftir gudstænastuna, eru væl egnaðar til endamálið.

Marjun Lómaklett verður burtur frá kallinum sum sóknarprestur í Norðoya vestara prestagjaldi í eitt ár.

Tað verður Øssur Kjølbro, prestur, ið verður virkandi sóknarprestur í Norðoya vestara prestagjaldi ta tíð, ið Marjun Lómaklett hevur integratión sum sítt virkisøki.