Búskaparráðið: Ferðavinnan má fáa hjálp

Búskaparráðið væntar, at føroyski búskapurin kemur heilt fyri seg aftur næsta ár.

Búskaparráðið metir, at búskapurin veksur 4,6 prosent í ár. Afturgongdin í fjør var minus 4,8 prosent í leypandi prísum.

Eftirspurningurin og keypiorkan vuksu í Føroyum í fjør.

Í ár fara útflutningsvinnurnar so líðandi at sleppa inn aftur á útlendsku marknaðirnar, samstundis sum útlendsk ferðafólk aftur sleppa til Føroya. 

Vit koma tó helst inn í 2022, áðrenn hetta hevur lagað seg heilt, sigur Búskaparráðið.

Mæla til hjálparpakka

Í ferðavinnuni er vandi fyri, at fyritøkur kunnu fara á húsagang, um tær missa eitt summar afturat. 

Búskaparráðið mælir tí landsstýrinum til at fyrireika ein hjálparpakka til ferðavinnuna, um ikki verður latið upp fyri ferðafólki í summar. 

Búskaparráðið mælir eisini til, at almenni raksturin og íløgurnar hvørki vaksa ella minka.

Brúk er fyri einari støðugari langtíðar íløgu- og rakstrarætlan.

Fleiri pengar úr vinnuni

Ráðið mælir til, at fleiri pengar verða tiknir frá teimum, sum hava brúksrættin til tilfeingið í fiskivinnuni og alivinnuni.

Og Búskaparráðið heldur eisini, at inntøkur og útreiðslur hjá tí almenna skulu tillagast, tá ræður um tørvin á vælferðartænastum í framtíðini, tí demografiin broytist.

Búskaparráðið leggur nú klokkan tíggju fram várfrágreiðingina.

Hetta er seinasta frágreiðingin hjá hesum Búskaparráðnum.