Liðskiparin vil hava bólt og úrslit

Liðskiparin á føroyska fótbóltslandsliðnum við monnum, Hallur Hansson, heldur, at møguleikin er góður fyri at fáa eitt gott úrslit móti Moldova í kvøld. 

 - Teir liggja niðast á styrkislistanum, men eg haldi, at út frá leikaratilfeinginum teir hava, so er tað góðir leikarar. Men teir hugsa tað sama um okkum, so hetta er heilt sikkurt ein dystur, sum vit fara út fyri at vinna, sigur Hallur Hansson.

Føroyski liðskiparin metir, at Moldova er nøkulunda á sama stigi sum fleiri av teimum londunum, sum Føroyar hava møtt síðstu árini og nevnir millum annað Kosovo og Lettland.

 - Skjótir og tekniskt sterkir spælarar, sum eru djarvir. Men kanska manglar taktiska disiplinin, sigur Hallur Hansson, sum kann fáa sín landsdyst nummar 55 í kvøld.