Mæla til at gevast við koppseting fyribils

Amerikanska mat- og heilivágsstýrið mælir nú til at steðga á við koronukoppingarevninum frá Johnson & Johnson.

Hetta gera tey, eftir at seks tilburðir av sjáldsomum blóðtøppum vórðu staðfestir hjá fólkum, sum eru koppsett við koppingarevninum frá Johnson & Johnson.

Tey, sum fingu blóðtøpparnar, vóru allar kvinnur, millum 18 og 48 ár, skrivar Reuters. Tær fingu blóðtøpparnar millum seks og 16 dagar eftir koppsetingina.

Umleið 120 milliónir fólk í USA eru koppsett fyri koronu. Nógv tey flestu eru tó koppsett við Pfizer og Moderna. Umleið 6,8 mió fólk eru higartil koppsett við Johnson & Johnson.

Eingin samanhangur ávístur

Er talan um samanhang millum blóðtøpparnar og koppsetingina, er tí fyribils talan um ein tilburð fyri hvørja mió. fólk, sum eru koppsett.

Danska TV2 skrivar, at amerikansku myndugleikarnir hava ikki ávíst samanhang enn, men teir mæla til at steðga á við koppsetingini.

Fríggjadagin boðaði heilivágsstovnurin hjá ES, EMA, frá, at stovnurin kannar fýra tilburðir av blóðtøppi, eftir at fólk vórðu koppsett við amerikanska koppingarevninum.