Kunnu landa 15 prosent uttanlands

Føroysk skip sleppa at landa 15 prosent av veiðuni uttanlands.

Løgtingið hevur fyri løtu síðani samtykt uppskotið hjá Jacobi Vestergaard, landsstýrismanni.

Tá atkvøtt varð við aðru viðgerð, vóru 14 atkvøður fyri og 12 ímóti.

Eitt broytingaruppskot frá einum minniluta í Vinnunevndini, Bjørt Samuelsen, Henriki Old og Bjarna Kárason Petersen, um at í mesta lagi 30 prosent av veiðuni av svartkjafti kunnu landast uttanlands í apríl og mai mánaði á hvørjum ári, fall. 

Samgonguumboðini í Vinnunevndini tóku undir við uppskotinum frá landsstýrismanninum.

Veiðigjøldini orsøkin

Sjófeingislógin ásetir annars, at øll veiða hjá føroyskum fiskiskipum skal landast í Føroyum.

Tað er lógaruppskotið um veiðigjøld, sum er orsøkin til broytingina.

Sambært lógaruppskotinum um veiðigjøld skal veiðigjaldið á uppsjóvarfisk ásetast eftir miðal avreiðingarprísunum árið fyri.

Við at loyva skipunum at landa 15 prosent av veiðuni uttanlands verður mett, at tað fer at tryggja prísásetingina í Føroyum.

FA: Ein gøla

Føroya Arbeiðarafelag hevur funnist hvassliga at uppskotinum.

Felagið sigur, at tað er ein gøla, at samgongan letur upp fyri møguleikanum, at 15 prosent av veiðuni kunnu landast uttanlands. 

Hetta rakar virkir um alt landið, fleiri fólk gerast arbeiðsleys og mugu í fiskavirkisskipanina í ALS, sigur Georg F. Hansen, formaður í Føroya Arbeiðarafelag.

Uppskotið skal hava eina viðgerð í tinginum aftrat.