Ísakalt millum Norðurkorea og USA

Norðurkorea hóttir USA eftir, at amerikanski forsetin, Joe Biden, herfyri kallaði landið eina hóttan móti trygdini. Tað skrivar tíðindastovan, AP.

Biden kallaði hósdagin í fyrstu røðuni til Kongressina kjarnorkuætlanirnar hjá Norðurkorea og Iran fyri eina álvarsliga hóttan móti USA og trygdina í heiminum.

Biden heldur fram við fíggindaliga politikkinum

Kwon Jong Gun, norðurkoreanskur embætismaður

Røðan hjá forsetanum fall ikki í góða jørð í Norðurkorea.

– Útsøgnin hjá Joe Biden vísir týðiliga, at hann ætlar at halda fram við fíggindaliga politikkinum mótvegis okkum.

Tað sigur Kwon Jong Gun, aðalstjóri í norðurkoreanska uttanríkisráðnum fyri amerikonsk viðurskifti, sambært tíðindastovuni Associated Press.

Viðurkenna ikki Biden sum forseta

Washington hevur síðani miðskeiðis í februar roynt at fáa í lag diplomatisk samband við Norðurkorea, men Norðurkorea hevur higartil ikki viðurkent Joe Biden sum forseta í USA.

Stutt áðrenn Joe Biden setti seg í stólin í Hvítu húsunum, segði einaræðisharrin í Norðurkorea, at USA var tann størsti fíggindin hjá landinum.

Kim Jong-un hevur kortini ikki víst diplomatiskt samband londini millum frá sær, skrivar bretska kringvarpið, BBC, á netinum.