Føroyingar liðugt koppsettir seint í august

Gongur sum ætlað, verða øll fólk í Føroyum liðugt koppsett fyri koronu seint í august. Tað sigur COVID-19 Koppsetingarbólkurin hjá sjúkrahúsverkinum í triðju støðulýsingini, sum kom týsdagin.

Heilsustýrið í Danmark væntar, at allir danir eru liðugt koppsettir seint í august. Í Føroyum fáa vit sama lutfall av koppingarevni svarandi til fólkatalið, sum í Danmark. Hetta merkir, at okkara tíðarætlan samsvarar við donsku tíðarætlanina.

Gagnnýtslan av koppingarevni høg

Í øðrum ársfjórðingi hava veitingarnar av koppingarevni frá Pfeizer/BioNTech verið munandi størri enn áður, og hetta hevur eisini havt við sær, at meira ferð nú er komin á koppsetingina.

Samanumtikið hevur tað gingið skjótt við koppsetingini í Føroyum, og gagnnýtslan av koppingarevninum hevur verið høg, sigur Koppsetingarbólkurin.

34,9 prosent av øllum fólkum í Føroyum hava nú fingið fyrra prikið, og 13,3 prosent eru liðugt koppsett, vísa nýggjastu tølini hjá landsstýrinum.