Mælir til lærlingaskipan fyri heilsuútbúgvingarnar

- Vit mugu fáa størri fleksibilitet í útbúgvingina til heilsuhjálpara og heilsurøktara, við at skipa útbúgvingina sum eina lærlingaskipan.

Tað sigur Heðin Mortensen, borgarstjóri í Havn og formaður í Kommunufelagnum.

- Vit eiga at umskipa útbúgvingina soleiðis, at hesin fakbólkur og kanska aðrir fakbólkar á eldraøkinum fáa løn undir útbúgving, sigur hann. 

Fjarlestur

- Vit áttu eisini at havt størri fleksibiltet í útbúgvingini. Ikki við at flyta skúlan úr Hovi, men við at gera útbúgvingina tilgongiliga norðanfjørðs, ella við at skipa partar av útbúgvingini sum fjarlestur, heldur formaðurion í Kommunufelagnum. 

Heðin Mortensen vísir á, at Kommunufelagið saman við Kommunala arbeiðsgevarafelagnum hevur sett eitt arbeiði í verk, sum skal fyrireika okkum til avbjóðingarnar, tá ræður um at fáa starvsfólk til eldraøkið.

Ein politiskur stýribólkur við landsstýrisfólkunum í almannamálum, fíggjarmálum, umhvørvis- og vinnumálum og formanninum og næstformanninum í Kommunufelagnum, umframt einum skrivara er settur at arbeiða við hesum.