Søguliga høg makrelkvota

Makrelfiskiskapurin verður 42 prosent hægri í ár, enn mett verður burðardygt at fiska. Tað er avleiðingin, nú londini í Norðuratlantshavi ikki semjast um fiskiskapin og í staðin áseta sær sínar egnu kvotur. Føroyska makrelkvotan verður heili 167.000 tons, sum er tað mesta nakrantíð.

Í desember í fjør var mest loyvd veiða, MLV, ásett til 852.000 tons. Men tá avtornar verða fiskað 350.000 tons afturat.

Fiskast skulu 1,2 milliónir tons av makreli í ár. Býtið millum londini verður hetta:

• Bretland: 26,08%, svarandi til 222.288 tons
• ES: 23,24%, svarandi til 198.063 tons
• Norra: 35%, svarandi til  298.299 tons
• Føroyar: 19,6%, svarandi til 167.048 tons
• Grønland: 7,04%, svarandi til 60.000 tons
• Ísland:  16,5%, svarandi til 140.627 tons
• Russland: 14,3%, svarandi til 120.423 tons

Prosentparturin er í mun til mest loyvdu veiðuna, MLV, á 852.284 tons, sum mett varð burðardygt at fiska í eini felags semju í desember fjør. 

Jacob Vestergaard, landsstýrismaður í fiskivinnumálum, og Jan Arge Jacobsen, fiskifrøðingur, vóru gestir í sjónvarpsstovuni.