Evstamark á midnátt at skipa stjórn í Ísrael

Í kvøld klokkan ein minutt í midnátt, er evstamark hjá andstøðuleiðaranum, Yair Lapid, at hava skipa nýggja stjórn í Ísrael.

Lapid hevur í løtuni tingingar við høgra-nationalistin, Naftali Bennett, um at skipa breiða samgongustjórn og reka Benjamin Netanyahu frá valdinum. 

Netanyahu hevur verið forsætisráðharri í 12 ár.

Nógvir flokkar

Breiða samgongan, sum roynt verður at skipa, verður mannað við flokkum á høgraveingi og vinstraveingi, har m.a. átrúnaðarligi flokkurin hjá Naftali Bennett, Yamina, er.

Netanyahu hevur funnist hvassliga at samgonguni, og hevur roynt at sannføra tinglimir í Yamina um at atkvøða ímóti samgonguni.

Fær samgongn millum Lapid og Bennett ikki undirtøku í tjóðartinginum, verður eftir øllum at døma aftur val í Ísrael. Tað verður so fimta valið í tvey ár.