Firvaldur sigraði á suverenu Erlu Kongsdóttir

Firvaldur av Tvøroyri tók øll á bóli, tá báturin vann á Erlu Kongsdóttir, sum hevur verið einaráðandi hjá 5-mannaførunum seinastu árini

Símun Christian Olsen

21.06.2021 - 10:00

Erla Kongsdóttir hevur verið einaráðandi hjá 5-mannaførum við kvinnum seinastu árini. Róðrar og FM-heitið eru vunnin ferð eftir ferð, og sjáldan hevur nakar hótt bátin úr Fuglafirði.

Men leygardagin ikki bara hótti Firvaldur. Báturin av Tvøroyri, sum hevur lutfalsliga nýggja og óroynda manning, gjørdi ikki mætari enn at vinna sundalagsróðurin - sum varð rógvin í Runavík - og nú er málið greitt.

- Einaferð skuldi Erla koppast, og at sleppa at verða tær, sum gjørdu tað, er heilt fantastiskt, sigur Sára Maria Johansen av Firvaldi.

- Vit hava sjálvandi sum mál, at vinna allar róðrarnar frameftir. Tað er tað, sum vit fara eftir og at blíva føroyameistarar eisini, leggur hon afturat.

Tey orðini fara at standa sína roynd á jóansøku leygardagin, har Erla Kongsdóttir óivað hevur aðrar ætlanir.

5-MANNAFAR KVINNUR

Nr.	Bátanavn	Tíð	Stig	Gult K.
1	Firvaldur	05:39.28	7	0
2	Erla Kongsdóttir	05:40.38	6	0
3	Blikur	05:42.32	5	0
4	Tjaldrið	05:44.38	4	0
5	Tekla	05:45.04	3	0
6	Spógvin	05:53.14	2	0
7	Tambar	05:56.01	1	0
8	Báran	06:01.46	0	0
9	Malunarhav	06:03.11	0	0
10	Tarvurin	06:06.09	0	1
11	Junkarin	06:11.49	0	0
12	Falkur	06:12.18	0	0
13	Ritan	06:13.15	0	0