Eftirmeta næmingatalið í flokkunum í fólkaskúlanum

Næmingatalið í flokkunum í fólkaskúlanum verður eftirmett.

Rættiliga nógvir næmingar eru í nógvum flokkum.

Sambært fólkaskúlalógini mugu ikki vera fleiri enn 24 næmingar í hvørjum flokki, tá skúlaárið byrjar. Tá næmingatalið er 27 ella fleiri, verða pengar latnir til tveir flokkar.

Men eru 25 ella 26 børn í einum flokki, í triðja til sjeynda flokki, verða pengar játtaðir til eykatímar.

159 flokkar hava 20 næmingar ella fleiri

Jenis av Rana, landsstýrismaður, hevur svarað einum spurningi frá Sirið Stenberg, løgtingskvinnu, um næmingatal í fólkaskúlanum.   

Í verandi skúlaári hava 159 flokkar 20 næmingar ella fleiri. Í 72 flokkum eru 24 næmingar ella fleiri. 

Jenis av Rana sigur eisini, at samgongan hevur sett sær fyri, at tillagingar og dygdargóðar broytingar verða gjørdar í fólkaskúlalógini í sambandi við millum annað floksstødd.

Sjøtul er settur á hetta arbeiðið.