Nýggj skundkanning kann vera atgongumerkið

"Um fólk vórðu kannað fjórða dagin eftir, at tey koma úr útlondum, og at allir festivalgestir vísa nýggja skundkanning, so hevði tað gjørt festivalin tryggari, heldur Pál Weihe, yvirlækni, nú G!-festivalurin verður hildin í juli - ímóti tilmælum frá Farsóttarnevndini.

Pál Weihe sigur, at tá tú ert koppsettur, vísa andevni seg longu eftir fáum døgum. Hesi vaksa so fylgjandi vikurnar. Fyri koppingarevnið frá Pfizer eru andevni hægst umleið tríggjar vikur aftan á fyrsta prikið - hetta verjir umleið 80 prosent.

Vanliga verður sagt, at fólk, ið eru koppsett tvær ferðir, eru fult vard, eftir 8 døgum - tá eru 90 prosent av andevni í kroppinum - onnur siga, tað tekur 14 dagar, tí tá eru andevnini uppi á 95 prosentum.

Pál Weihe heldur, at nýggj PCR-test sum partur av atgongumerkinum hevði givið eina rættiliga stóra trygd.