Eftir løgtingsvalið í 1920, var umval í Norðstreymoy, tí hol var í hurðini

Trý løgtingsval vóru í 1920-árunum. Í 1923 fekk løgtingið egna skrivstovu við skrivstovustjóra, í 1924 varð nýggj vallóg sett í gildi, sum eitt nú hevði við sær, at alt løgtingið verður valt fjórða hvørt ár. Og í 1925 varð Javnaðarflokkurin stovnaður.

Í 1921 vitjaði Christian hin 10., kongur í Føroyum, og í fylginum vóru Alexandrine, drottning, og synirnir, Fríðrikur, krúnprinsur, og Knút, prinsur. Hetta var triðja kongsvitjanin í Føroyum, og vitjað var í Suðuroy, Havnini og í Klaksvík.
Í Havn legði drottningin grundarsteinin til Dronning Alexandrines Hospital, ið varð tikið í nýtslu í 1924.

Dronning Alexandrines Hospital fekk stóran týdning

Við nýggja hospitalinum varð føroyska sjúkrahúsverkið dagført við tí tøkni, sum tøk var tá, og hetta var eisini eitt tekin um, at vit vildu víðari og ikki bara vera á amtshospitalstøði, sigur Pál Weihe, yvirlækni á medisinskari deild á Landssjúkrahúsinum og professari í fólkaheilsu.

Eftir 1910 fóru tær fyrstu ungu føroysku kvinnurnar til Danmarkar á sjúkrasystraskúla. Og tíggju ár seinri - í 1920, fýra ár fyri Færø Amts Hospital varð niðurlagt, byrjaði ein rættulig útbúgving av sjúkrasystrum í Føroyum, skipað av diakonissunum og medisinska yvirlæknanum á sjúkrahúsinum.

Í 1921 legði Alexandrina, drottning, grundarsteinin til “Dronning Alexandrines Hospital”, og í februar 1924 var nýggja sjúkrahúsið, ið varð teknað av H. C. W. Tórgarð, og sum hevði 65 seingjarpláss, tikið í nýtslu – og hetta var annars samstundis sum fyrstu sjúkrasystrarnar vóru útbúnar í Føroyum.

Nomið verður eisini við hvønn týdning tað fekk, at tað beint fyri ólavsøku í 1921 eydnaðist einum granskingarliði á universitetinum í Toronto undir leiðslu av Frederick G. Bantin at fráskilja ella isolera insulini, og at læknin og bakteriufrøðingurin, Alexander Fleming, í september 1928 av tilvild fann fram til bakteriudrepandi evnini hjá ávísum blámusoppum, ið sum fráleið hevði við sær framleiðsluna av penisillini.

Luttakarar í sendingini eru Hans Andrias Sølvará, professari í søgu, og Pál Weihe, yvirlækni á medisinskari deild á Landssjúkrahúsinum og professari í fólkaheilsu.

Tú kanst hoyra sendingina her!