Landslæknin mælir fólki til at kanna seg tvær ferðir

- Tað eru serliga tey, sum ikki eru koppsett, sum mugu ansa sær og lata seg kanna.

Tað sigur landslæknin, eftir at koronusmitta í gjár var staðfest hjá einum fólki, sum var til konsert hjá James Blunt í høllini á Hálsi leygarkvøldið.

- Enn er ov tíðliga at siga, hvussu álvarsamt hetta kann vera, sigur Lars Fodgaard Møller, landslækni, eftir at hann sendi eina fráboðan út til øll tey, sum vóru á konsertini seint seinnapartin í gjár.

Kanna seg tvær ferðir

Landslæknin mælir til, at øll, sum fáa sjúkueyðkenni, lata seg kanna alt fyri eitt. Eisini verður mælt til, at øll, sum ikki eru liðugt koppsett, lata seg kanna bæði mikudagin og fríggjadagin.

Leygardagin vóru annars tilsamans átta nýggir smittutilburðir staðfestir.

Í øllum førum er smittukeldan kend, og øll fólkini eru smittað í Føroyum.