Heitir á øll um at lata seg koppseta

Landsstýrismaðurin í heilsumálum, Kaj Leo Holm Johannesen, heitir nú á allar føroyingar, sum enn ikki eru koppsettir, um at lata seg koppseta.

Landsstýrismaðurin sigur í áheitanini: 

Tað eru alt ov nógv ung og yngri, sum annaðhvørt ikki vilja koppseta seg, ella halda, at júst tey ikki hava koppseting fyri neyðini. Men tað hava tey. Við at koppseta teg, verjir tú teg sjálvan og øll rundan um teg. Og harvið verjir tú alt samfelagið, tí vit vita, at um smittutølini hjá okkum verða ov stór, so kann trýstið á heilsuverkið eisini gerast hættisliga stórt. 

Mín áheitan er tí púra greið: Tit, sum ikki longu eru koppsett, gerið tað nú, sigur Kaj Leo Holm Johannesen.

84 prosent koppsett tvær ferðir

84 prosent av øllum føroyingum, eldri enn 12 ár, eru koppsett tvær ferðir fyri koronu.

Tey flestu, sum ikki eru koppsett, eru í teimum yngru aldursbólkinum. 

Í aldursbólkinum 12-14 ár hava 39 prosent fingið bæði prikini. 

Í aldursbólkinum 16-19 ár hava 79 prosent fingið annað prikið,  og í aldursbólkinum 25-29 ár hava 81 prosent fingið annað prikið.

Lesið áheitanina frá Kaj Leo Holm Johannesen, landsstýrismanni, her.