Krevja koronupass í Svøríki 1. desember

Svøríki fer at krevja koronupass 1. desember, upplýsti Lena Hallengren, heilsumálaráðharri, á tíðindafundi seinnapartin.

Orsøkin er, at smittan er farin at breiða seg í landinum, og tey, sum ikki eru koppsett, eru í størri vanda fyri at smitta onnur, sigur heilsumálaráðharrin.

Kravið um at vísa koronupass verður galdandi fyri tiltøk, har fleiri enn 100 fólk koma saman, eitt nú ítróttartiltøk, sjónleikaframførslur og biografsýningar.

Matstovur sleppa undan

Einki krav verður um at vísa koronupass á matstovum, har eingin dansur er. Og heldur einki krav er um at vísa koronupass í handlum, skúlum og almennu ferðsluni.

Heilsumyndugleikarnir siga, at roknast kann við, at koronusmittan fer at breiða seg í Svøríki. Teir vísa m.a. til gongdina í Hollandi, Eysturríki og Danmark seinastu tíðina, har smittan er vaksin nógv seinastu tíðina, serliga millum tey, sum ikki er koppsett.