Framskunda triðja prik í Danmark

Triðja prikið fyri koronu verður nú framskundað í Danmark. 

Tað kunngjørdi danski heilsumálaráðharrin, Magnus Heunicke í gjár.

Tað merkir, at í dag kunnu tey, sum eru yvir 40 ár, fáa triðja prikið fýra og ein hálvan mánað eftir annað prikið.

Sambært góðkenningini frá evropeiska heilivágsstovninum, EMA, av koronuvaksinunii verður mælt til, at triðja prikið ikki verður givið fyrr enn hálvt ár eftir annað prik. 

Ráðiligt at framskunda

Men tað er ráðiligt at framskunda triðja prikið, sigur stjórin á danska Serumstovninum, Søren Brostrøm, sambært danska kringvarpinum.

- Vit hava gjørt eina vælgrundaða meting um koppingarevnið, og hava hugt at royndunum í øðrum londum, har tey hava koppsett aftur, áðrenn eitt hálvt er runnið.

Haraftrat hava vit hugt at fyribilstølum um omikron-frábrigdið, og vit síggja, at triða prikið verjir væl fyri álvarsamari sjúku. Tí noyðast vit at taka eitt tak longu nú, tí omikron breiðir seg so skjótt, sigur Søren Brostrøm.

40 ára gomul í størri vanda

Sambært Serumstovninum, eru tað serliga tey yvir 40, sum eru í størri vanda fyri at gerast álvarsliga sjúk av koronu, og tí er neyðugt at fleiri eru mótstøðufør. 

Serumstovnurin upplýsir, at mótstøðuførið móti koronu minkar so líðandi, serliga fýra til seks mánaðir eftir koppseting.

Fýra og ein hálvur mánaður verður roknaðir sum 20 vikur, ella 140 dagar eftir aðru koppseting.