Lítil áhugi at garva skinn

Í fíggjarlógini fyri í ár eru játtaðar 300 túsund krónur til endamálið. 

Játtanin kom á fíggjarlógina í 2020 og skal tryggja, at føroysk seyðaskinn koma til høldar og ikki verða brend á brennistøðunum. 

Stuðul verður veittur sum endurgjald fyri djóralæknakanningar og -váttanir og fyri flutning í sambandi við, at skinnini skulu garvast.

Oikos átti umsóknina

Oikos í Vágum hevur í fleiri ár tikið móti skinnum, og tað gjørdu tey eisini í heyst. Felagið átti aftur í ár umsóknina.

Sigurd Nordendal, ein av eigarunum, sigur, at marknaðurin er minkaður og broyttur, og tí hava tey bara tikið ímóti so nógvum skinnum, sum tey sleppa av við. 

Í løtuni er bara eftirspurningur eftir skinnum í ymiskum litum, og tí hava tey verið noydd at sleppa sær av við flestu hvítu skinnini.

Tróndur G. Leivsson, stjóri í Búnaðarstovuni, sigur, at umsøkjari fær svar, tá ið nakrar vikur eru farnar av næsta ári.