Steypakappinging í flogbólti byrjar

Mjølnir og Ternan spæla í kvøld fyrsta dystin í steypakappingunum í flogbólti, sum eru á skránni tvær tær næstu vikurnar, skrivar Flogbóltssamband Føroya í facebook.

Spælt verður í bólkaspæli um pláss í hálvfinalunum, sum verða spældar í badmintonhøllini í Klaksvík 12. februar.

Bæði hjá kvinnum og monnum eru tveir bólkar. Hjá kvinnum eru Mjølnir, SÍ, KÍF og Ternan í bólki 1, meðan Fleyr, TB og Dráttur eru í bólki 2.

Hjá monnum eru ÍF, SÍ og Ternan í bólki 1, meðan Fleyr, Mjølnir A og Mjølnir B eru í bólki 2. Tvey tey ovastu liðini í hvørjum bólki fara í hálvfinalurnar.

Sjálvar finalurnar verður spældar í høllini á Hálsi 26. februar.

Í fjør vunnu kvinnurnar hjá SÍ steypafinaluna eftir dramatiskan fimm-settara ímóti Drátti, og hjá monnunum var ikki minni drama, tá ÍF tryggjaði sær steypið eftir 3-2 sigur á Mjølni.