Skund-dómar fyri rúsevnasmugling

Tveir menn hava fingið ein skund-dóm fyri rúsevnasmugling.

Teir vóru tiknir á flogvøllinum leygarkvøldið, og longu í seinnapartin í gjár vóru teir dømdir í Føroya rætti fyri at royna at smugla 300 gramm av hashi til Føroya.

Báðir játtaðu seg sekar, sigur politiið.

Annar maðurin fekk 40 daga treytaleysa fongsulsrevsing. Hin fekk 50 dagar, tí hann hevur gjørt okkurt revsivert framanundan tí, sum hann var dømdur fyri í gjár, og ikki enn hevur sitið fyri.

Báðir menninir, sum eru føroyingar, tóku við dóminum.

Menninir, sum eru fyrst í fjørutiárunum, eru latnir leysir, og verða boðsendir, tá teir skulu inn at sita.