Widerø fer at flúgva fýra ferðir um vikuna

Stjórin í Vága floghavn sigur, at lutfalsliga nógvir norðmenn eru komnir til Føroya við Widerøe, og felagið byggir virksemið á egið grundarlag

Widerøe hevur flogið til Føroya tvær ferðir um vikuna síðani í heyst. Í mai verður flogið fýra ferðir um vikuna.

Mynd: Bjarni Árting Rubeksen

Høgni Djurhuus

19.01.2022 - 08:35

Norska flogfelagið Widerøe er so nøgt við Føroyaflúgvingina, at felagið fyrst í mai fer at flúgva fýra ferðir um vikuna til Føroya úr Bergen, fríggjadag og mánadag sum nú, og haraftrat hósdag og sunnudag.

- Hetta eru ógvuliga gleðilig tíðindi at frætta, ikki minst í hesum tíðum, nú tey flestu mest hugsa um at repa seglini, sigur Regin I. Jakobsen, stjóri í Vága Floghavn.

Hann sigur, at lutfalsliga nógvir norðmenn eru komnir til Føroya við Widerøe.

Hava flogið síðani í heyst

Hetta merkir, at felagið í stóran mun byggir virksemið á egið kundagrundarlag, sigur Regin I. Jakobsen.

Widerøe hevur flogið til Føroya síðani í september í fjør.

Widerøe brúkar Bombardier Dash 8 Q400 flogfør til Føroyaflúgvingina, Tey taka 78 ferðafólk.