Russar royna nú at kringseta Kyiv

Sambært ukrainsku stjórnini, hevur russiski herurin nú kós móti høvuðsstaðnum Kyiv og roynir at minka mótstøðuna og kringseta býin.

Røðin av hernaðarakførum uttan fyri høvuðsstaðin stendur framvegis still. 

Russar hava kringsett havnarbýin, Mariupol, hann er framvegis undir ukrainskum valdi, men hevur hvørki vatn ella el.

Havnarbýurin, Kherson, har suðuri í Ukraina er framvegis einasti býurin, sum er fult og heilt undir russiskum valdi, síðani innrásin byrjaði. 

33 fólk doyðu í gjár í býnum, Chernihiv, eftir at russisk álop raktu búeindir, umframt skúlar í býnum, siga lokalir myndugleikar. 

Sprongdu kjarnorkuverk

Klokkan eitt í nátt føroyska tíð kom eldur í eitt kjarnuorkuverk í Ukraina eftir eitt russiskt álop, sigur uttanríkisráðharrin í Ukraina. 

Nakrar tímar seinni komu boðini um, at bardagarnir vóru steðgaðir, og at kjarnorkuverkið var tryggjað.

Sløkkiliðsfólk sluppu framat og royndu at sløkkja eldarnar. Myndugleikarnir siga, at kjarnorkuverkið hevur ikki fingið skaða, í øllum førum ikki so mikið, at vandi er á ferð, sum støðan er. 

Volodymyr Zeleniskj

Ukrainski forsetin, Zelenskij, sigur, at nú mugu evropearar vakna. (Mynd: Ritzau Scanpix)

Men álopið á kjarnorkuverkið hevur fingið heimsleiðarar finnast hvassliga at russisku leiðsluni. Forsetin í Ukraina, Volodymyr Zelensky segði í bandaðari røðu í nátt okkara tíð, at nú mugu evropearar vakna. 

- Verður ein spreinging, so er tað endin á okkum øllum, endin á Evropa. Bert ein skjót handling frá Evropa kann steðga russisku hermonnunum og forða fyri, at Evropa doyr sum avleiðing av spreingingini av einum kjarnuorkuverki, sigur hann. 

Sí video-brot frá AP-tíðindastovuni frá álopinum á ukrainska kjarnokuverkið í nátt:

Boðar til snarfund

Bretski forsætisráðharrin, Boris Johnson, hevur boðað til snarfund Í Trygdarráðnum hjá ST eftir álopið á kjarnuorkuverkið. 

Hann ákærir Putin fyri at seta alt Evropa í vanda eftir álopið á kjarnuorkuverkið. 

- Forsætisráðharrin heldur, at náðileysu gerðirnar hjá Putin beinleiðis seta alla trygdina í Evropa í vanda, stendur í skrivinum frá bretska forsætisráðharranum.  Aftrat honum hava fleiri heimsleiðarar alment boðað frá, at teir fordøma álvarsligu gerðina at leypa á kjarnorkuverkið.

Ukrainskir myndugleikar siga, at tað var torført hjá sløkkiliðsfólki at sleppa fram at verkinum, men at kjarnorkuverkið nú er tryggjað.