Jacob Vestergaard er nú løgtingsgrannskoðari

Jacob Vestergaard er vorðin løgtingsgrannskoðari í staðin fyri Una Rasmussen, sum er farin í landsstýrið.

Av tí at Fólkaflokkurin er størstur flokkur í tinginum, er Jacob Vestergaard formaður hjá løgtingsgrannskoðarunum. 

Hinir løgtingsgrannskoðarnir eru Beinta Løwe, Djóni Nolsøe Joensen og Rósa Samuelsen.

Hvat ger løgtingsgrannskoðarin?

Løgtingsgrannskoðararnir ansa eftir, at allar inntøkur landsins eru settar í roknskapin, og at eingin útreiðsla er goldin uttan heimild í fíggjarlóg ella aðrari játtanarlóg.

Løgtingsgrannskoðararnir ansa eisini eftir, at roknskapurin er rættur, og at tær avgerðir, sum roknskapurin fevnir um, eru samsvarandi veittum játtanum, galdandi lógum og fyriskipanum, verandi avtalum og vanligum siði.

Harumframt verður ansað eftir, at tað er hóskandi atborið fíggjarliga í sambandi við umsiting  av ognum og viðvíkjandi rakstri av teimum stovnum og tí virksemi, roknskapurin fevnir um.

Sum grundarlag undir virki sínum, kunnu løgtingsgrannskoðararnir nýta tær váttanir, frágreiðingar o.t., ið roknskapargrannskoðanin letur úr hondum.

Løgtingslógin um grannskoðan kann lesast her.