Biden og Ping hava telefonfund seinnapartin

Amerikanski forsetin, Joe Biden, og Xi Jinping, forseti í Kina, fara á telefonfund nú kl. 13 okkara tíð. 

Tað upplýsir Jean Psaki, samskiftisstjóri í Hvítu Húsunum.

- Ríkisleiðararnir skulu røða um, hvussu kappingin millum stórveldini verður hildin innan fyri rímiligt mark, um russisku innrásina í Ukraina og onnur mál, sum ávirka áhugamálini hjá báðum londunum, sigur Psaki.

Kríggið í Ukraina og mátar at enda kríggið, verða helst eisini á skránni.

Kina hevur ikki fordømt russisku innrásina í Ukraina, og tað verður eisini viðgjørt á fundinum, sigur Jennifer Psaki.

Fer at kosta Kina dýrt

Biden fer at gera Kina greitt, at tað verður dýrt fyri Kina, um landið á ein ella annan hátt bjargar Russlandi úr búskaparligu trupulleikunum, sum fara at standast av tiltøkunum, sum Vesturheimurin hevur sett í gildi móti Russland.

Kina hevur framvegis ikki boðað frá, hvørja støðu landið hevur til russisku innrásina, og telefonfundurin millum Biden og Xi er gott høvi at fáa hylling á, hvar Xi stendur í sambandi við russisku innrásina. 

Politiskir viðmerkjarar siga, at stjórnir bæði eystanfyri go vestanfyri stúra fyri, at Kina fer at veita Russlandi umfatandi stuðul og enntá hernaðarligan stuðul.