Fyrsti ukrainin fingið uppihaldsloyvi í Føroyum

Fyrsti ukrainin hevur fingið uppihaldsloyvi í Føroyum eftir serlógini, sum gevur fólki, sum eru rikin úr Ukraina, loyvi til fyribils at hava uppihald í Føroyum í upp til tvey ár.

Sunnudagin søktu fyrstu 15 ukrainarnir um uppihaldsloyvi, og í gjár var fyrsta loyvið avgreitt. 

Higartil hava okkurt um 40 ukrainar søkt um uppihaldsloyvi.

Kunnu fara til arbeiðis alt fyri eitt

Ukrainar, sum higartil eru komnir til Føroya, hava fingið eitt stað at búgva.

Men tey fara í móttøkuhúsið, sum Útlendingastovan og Reyði Krossur hava skipað í Føroya fólkaháskúla, fyri at avgreiða umsóknir um uppihaldsloyvi og fyri at verða kunnað um føroyska samfelagið.

Eyðkenni við serlógini samanborið við vanligu útlendingalóggávuna, er, at fólk, sum fáa fyribils uppihaldsloyvi, kunnu fara til arbeiðis alt fyri eitt, uttan at skula hava serskilt arbeiðsloyvi. 

Nakrir ukrainar fara væntandi til arbeiðis eftir páskir. 

Magnus Rasmussen

Kunna um arbeiðsmarknaðin

Í næstum skipar Vinnuhúsið fyri kunnandi tiltaki, har ukrainar í Føroyum verða kunnaðir um føroyska arbeiðsmarknaðin.

- Vit vita, at avbjóðingar kunnu stinga seg upp, og tí hava vit sett á stovn samskipandi eind, sum tryggjar eitt smidligt samstarv millum avvarðandi myndugleikar og tænastuveitarar, sigur Magnus Rasmussen, landsstýrismaður.

Í samskipandi eindini eru Umhvørvis- og Vinnumálaráðið, Almannamálaráðið og Almannaverkið, Heilsumálaráðið, Uttanríkis- og Mentamálaráðið, løgreglan, Undirvísingarstýrið, Kommunufelagið og Reyði Krossur.