Partrolararnir smáligt fiskarí

Partrolararnir hava framvegis smáligt fiskarí, skrivar Fiskamarknaðurin.

Fimm pør eru úti, og tvey pør fiska gulllaks.

Tvey ísfiskalínuskip eru úti. Eisini tey hava smáligt fiskarí. Seks frystilínuskip eru við Eysturgrønland, og tvey eru undir Føroyum.

Um útróður verður sagt, at streymurin batnar, sum vikan gongur, og veðrið verður brúkiligt. Útróðrarbátarnir fáa heldur ikki nógv, skrivar Fiskamarknaðurin.

Ein djúpvatnstrolari fiskar kongafisk. Tveir trolbátar fiska tosk, hýsu og flatfisk. 

Í gjár kundu trolbátarnir fara á landleiðina at royna.

Tvey garnaskip fiska svartkalva, og tvey fiska havtasku. Hjá teimum er fiskaríið brúkiligt, skrivar Fiskamarknaðurin.